Lufta në Siri tërhoqi qindra të rinj nga vende të ndryshme të botës, përfshirë edhe Kosovën. Të ndikuar nga ideologji të ndryshme, shumë prej tyre morën vendime që do t’u ndryshonin jetën përgjithmonë. Një nga këto histori është ajo e Sadriut, një djalë i ri nga Hasi, i cili, si shumë të tjerë, e gjeti veten të përfshirë në një konflikt të huaj, larg familjes dhe jetës që njihte. I lindur dhe rritur në Has, Sadriu, njihej si një djalë inteligjent, në moshë të re, ai kaloi disa vite në vende të ndryshme të Bashkimit Evropian, ku u njoh me kultura dhe mënyra të ndryshme jetese.

Gjatë kësaj periudhe, ai takoi një boshnjak, përmes të cilit filloi të interesohej për fenë islame. Me kalimin e kohës, ai u angazhua gjithnjë e më shumë në praktikimin e rregullt të fesë. Në të njëzetat e tij ai u martua dhe së bashku me bashkëshorten e tij, Vildanen, vendosën të largohen drejt Suedisë. Nga atje, në rrethana ende të paqarta, ata morën vendimin për të udhëtuar drejt Irakut, duke hyrë kështu në një rrugë të rrezikshme dhe të panjohur për ta.

Vajza që rrëfen historinë është Fjolla Nerjovaj, motra e Sadriut. Ajo tregon me emocion dhe dhimbje që i përjetuan për një dekadë gjatë rrugëtimit të vëllait të saj dhe familjes së tij. Në vitin 2014, Sadriu dhe Vildana u nisën fillimisht për në Suedi, por pas disa muajsh ata vendosën të udhëtojnë drejt Irakut. Aty qëndruan për disa muaj, derisa në vitin 2015 u futën në Siri, një vend tashmë i shkatërruar nga lufta.

Gjatë katër viteve qëndrimi në Siri, Sadriu punoi në një furrë buke, ndërsa familja e tij u rrit – gjatë kësaj periudhe, atij i lindën tre fëmijë. Por jeta në një zonë lufte ishte gjithnjë e më e rrezikshme. Në vitin 2019, i detyruar nga rrethanat, ai vendosi të dorëzonte gruan dhe fëmijët e tij në një kamp refugjatësh, pasi ishte e vetmja mënyrë për t’i shpëtuar. Ndërkohë, ai, si pjesë e grupit “Al Nusra”, ra në duart e një grupi kurd, i cili e burgosi.

Në atë moment të vështirë, ndërhyrja humanitare e Presidentit Behgjet Pacolli bëri që Vildana dhe tre fëmijët e saj të shpëtoheshin dhe të ktheheshin në Kosovë në vitin 2019. Ndërsa Sadriu mbeti në burg deri në vitin 2021, kur sërish falë angazhimit të Presidentit Pacolli, ai u lirua dhe u rikthye në atdhe. Megjithatë, ai duhej të përballej me pasojat ligjore të veprimeve të tij – në Kosovë, ai vuajti një dënim prej tre vitesh burg, sipas ligjit që parashikon ndëshkime për ata që i bashkohen konflikteve të huaja.

Kjo histori është një dëshmi e fuqisë së ndërhyrjes humanitare dhe e vështirësive që përballin individët e përfshirë në konflikte të largëta. Rrëfimi i Fjollës sjell në pah dhimbjen e familjes, sakrificat dhe shpresën që e mbajti të gjallë deri në kthimin e vëllait të saj në shtëpi.